बीड : मराठवाड्यात आरक्षणाच्या प्रश्नावरून गेल्या काही दिवसांपासून तणाव वाढत चालला आहे. ओबीसी आरक्षणाबाबत सुरू असलेले आंदोलन आणि त्यातून निर्माण झालेलं वातावरण अनेक ठिकाणी उग्र स्वरूप घेताना दिसत आहे. अशातच माजलगाव तालुक्यातील सावरगाव परिसरात घडलेली एक धक्कादायक घटना सध्या संपूर्ण जिल्ह्यात चर्चेचा विषय बनली आहे. ओबीसी नेते लक्ष्मण हाके यांचे अत्यंत विश्वासू व जवळचे सहकारी म्हणून ओळखले जाणारे पवन करवर यांच्यावर मंगळवारी रात्री तब्बल ४० ते ५० हल्लेखोरांनी जीवघेणा हल्ला केला. या हल्ल्यात करवर गंभीर जखमी झाले असून त्यांचे तिघे साथीदार देखील किरकोळ जखमी झाले आहेत.
धाब्यावर अचानक हल्ला
मिळालेल्या माहितीनुसार, पवन करवर आणि त्यांचे साथीदार मंगळवारी रात्री साडेनऊच्या सुमारास सावरगावजवळील एका धाब्यावर जेवणासाठी थांबले होते. वातावरण पूर्णपणे शांत असताना अचानक धाब्यावर ४० ते ५० युवकांनी धाव घेतली. हातात काठ्या, दांडके, लोखंडी रॉडसह लाठ्यांकाठ्यांनी सुसज्ज असलेल्या या टोळक्याने कोणतीही पूर्वसूचना न देता हल्ला सुरू केला. काही क्षणांतच धाबा परिसरात एकच गोंधळ उडाला. करवर यांना जमिनीवर पाडून त्यांच्या डोक्यावर व शरीरावर वार करण्यात आले. त्यांच्या सोबत असलेल्या तिघांनाही मारहाण करण्यात आली. अचानक झालेल्या या हल्ल्यामुळे इतर ग्राहक व धाब्यावरील कर्मचारी देखील घाबरले व जीव वाचवण्यासाठी पळ काढला.
गंभीर जखमी, तातडीने रुग्णालयात हलवले
हल्ल्यात पवन करवर यांच्या डोक्याला गंभीर दुखापत झाली आहे. रक्तस्त्राव जास्त झाल्याने त्यांना तातडीने माजलगाव येथील खासगी रुग्णालयात दाखल करण्यात आले. डॉक्टरांनी करवर यांची प्रकृती चिंताजनक असल्याचे सांगितले असून त्यांच्यावर सध्या अतिदक्षता विभागात उपचार सुरू आहेत. त्यांच्या तिघा साथीदारांनाही मार लागला असून त्यांच्यावरही उपचार सुरू आहेत.
पोलीस घटनास्थळी दाखल, गुन्हा दाखल
घटनेची माहिती मिळताच ग्रामीण पोलिस ठाण्याचे पोलिस निरीक्षक बालक कोळी तातडीने घटनास्थळी दाखल झाले. जखमींना रुग्णालयात हलवण्यात आले असून घटनास्थळाचा पंचनामा करण्यात आला आहे. हल्ला करणारे सर्वजण घटनास्थळावरून पसार झाले आहेत. पोलिसांनी अज्ञातांविरुद्ध गुन्हा दाखल करून पुढील तपास सुरू केला आहे. सीसीटीव्ही फुटेज, स्थानिकांकडून माहिती आणि मोबाईल लोकेशनच्या आधारे हल्लेखोरांचा शोध सुरू आहे.
पूर्वीही झाला होता हल्ल्याचा प्रयत्न
लक्ष्मण हाके यांच्यावर काही आठवड्यांपूर्वी गेवराई तालुक्यात हल्ल्याचा प्रयत्न झाला होता. त्या वेळी पवन करवर यांनी स्वतःला धोका पत्करून हाके यांना वाचवण्याचा प्रयत्न केला होता. त्यामुळे करवर यांच्यावर झालेला हल्ला हा केवळ योगायोग आहे की पूर्वनियोजित सूडाचा भाग आहे, याबाबत चर्चा रंगल्या आहेत.
लक्ष्मण हाकेंचा संताप
जवळच्या सहकाऱ्यावर झालेल्या या हल्ल्यानंतर ओबीसी नेते लक्ष्मण हाके यांनी संताप व्यक्त केला आहे. “पवन करवर यांच्यावर जातीयवाद्यांनी केलेल्या भ्याड हल्ल्याचा मी तीव्र निषेध करतो. हे प्रकरण केवळ वैयक्तिक नाही तर सामाजिकदृष्ट्या गंभीर आहे. आम्ही अशा हल्ल्याला भीक घालणार नाही,” अशी ठाम भूमिका हाके यांनी घेतली आहे. त्यांनी पोलिस प्रशासनाकडे हल्लेखोरांवर कठोर कारवाई करण्याची मागणी केली आहे.
माजलगावमध्ये भीतीचे वातावरण
या घटनेनंतर माजलगाव परिसरात भीतीचे वातावरण पसरले आहे. नागरिकांमध्ये भीतीचे व दहशतीचे वातावरण असून गावात मोठ्या प्रमाणात पोलिस बंदोबस्त तैनात करण्यात आला आहे. गावात अफवांना ऊत येऊ नये यासाठी पोलिसांनी सतर्कता बाळगली आहे. या हल्ल्याचा परिणाम स्थानिक राजकारणावर होण्याची शक्यता वर्तवली जात आहे.
पूर्वनियोजित हल्ल्याची शक्यता
हा हल्ला अचानक वादातून झाला की पूर्वनियोजित होता याबाबत अजूनही स्पष्टता नाही. मात्र करवर यांची ओळख, त्यांचे हाके यांच्याशी असलेले निकटचे संबंध आणि आधी घडलेल्या घटनांचा विचार करता हा हल्ला आखणी करूनच करण्यात आल्याचा संशय व्यक्त केला जात आहे. पोलिस तपासात यावर नेमकी माहिती समोर येईल.
