बीड | प्रतिनिधी
ऑनलाइन मॅट्रिमोनिअल वेबसाईटवरून झालेली ओळख बीड जिल्ह्यातील एका घटस्फोटीत महिलेसाठी जीवघेणी ठरली आहे. छत्रपती संभाजीनगर येथील एका हॉटेल मॅनेजरने लग्नाचे आमिष दाखवून तिच्यावर अत्याचार केल्याची धक्कादायक घटना उघडकीस आली आहे. या प्रकरणी शिवाजीनगर पोलिस ठाण्यात गुन्हा दाखल करण्यात आला आहे.
तक्रारीनुसार, बीड जिल्ह्यातील 36 वर्षीय पीडित महिला स्वाती (नाव बदललेले) हिचे वैवाहिक जीवन 2016 साली तणावात आले आणि त्यानंतर ती विभक्त राहू लागली. योग्य जीवनसाथीच्या शोधात ती 2019 मध्ये एका लोकप्रिय मॅट्रिमोनिअल संकेतस्थळावर सक्रिय झाली. त्याचदरम्यान तिची ओळख छत्रपती संभाजीनगर येथील हॉटेल मॅनेजर भूषण गायधनी याच्याशी झाली.
प्रारंभी दोघांमध्ये नियमित संपर्क सुरू झाला. भूषणने लग्नाचे आश्वासन देत स्वातीला छत्रपती संभाजीनगर येथे बोलावले. मात्र येथे आल्यानंतर त्याने तिच्यावर शारीरिक अत्याचार केल्याचा आरोप महिलेने केला आहे. पुढील काही महिन्यांमध्येही तो सतत लग्नाचे आश्वासन देत संबंध ठेवत होता. नंतर महिलेचा गर्भधारणा झाल्याचे समजल्यावर, तिला जबरदस्तीने गर्भपात करण्यास भाग पाडले, असेही तिने पोलिसांना सांगितले आहे.
घडलेल्या प्रकाराने हादरलेल्या पीडितेने अखेर धैर्य एकवटत शिवाजीनगर पोलिस ठाण्यात तक्रार दाखल केली. पोलिसांनी भूषण गायधनी याच्याविरुद्ध बलात्कार, फसवणूक आणि धमकी या गंभीर कलमांखाली गुन्हा नोंदवून तपास सुरू केला आहे.
पोलिसांनी या घटनेचा पुढील तपास सुरू केला असून, मॅट्रिमोनिअल वेबसाईट्सवर ओळखी करताना महिलांनी विशेष दक्षता घेण्याचे आवाहन केले आहे.
