१० वर्षांपासून सूड उगवण्याची वाट पाहत होता, संधी मिळताच तरुणाचा गळा चिरला — बापाच्या अपघाती मृत्यूचा थंड डोक्याने घेतला बदला
शिवहर, बिहार : मनात सात वर्षांपासून सुडाची आग धगधगत ठेवायची, वेळ येताच विश्वासात घ्यायचे, नशा करायला न्यायचे आणि मग निर्जन जागी नेऊन निर्घृणपणे गळा चिरायचा — हे एखाद्या चित्रपटातील दृश्य वाटत असले, तरी ही भयावह घटना बिहारच्या शिवहर जिल्ह्यात प्रत्यक्षात घडली आहे. मुजफ्फरपूर-शिवहर सीमेवरील एका गव्हाच्या शेतात ३५ वर्षीय विनोद राय याचा मृतदेह आढळून आला, आणि संपूर्ण परिसरात एकच हादरा बसला.
२०१७ पासून धुमसत होता राग
गंगा धरमपुर येथील रहिवासी विनोद राय याने २०१७ साली आपल्या शेतात सिंचनासाठी विजेची तार लावली होती. त्या तारेचा स्पर्श झाल्याने शेजारच्या अरुण कुमारच्या वडिलांचा दुर्दैवी मृत्यू झाला. ती घटना अपघाती होती, परंतु अरुणने ते मनात इतके खोलवर जपून ठेवले की त्याचे रूपांतर हळूहळू द्वेषात झाले आणि नंतर थेट खुनी इराद्यात. “तुला जगू देणार नाही” — अशा धमक्या अरुण विनोदला वारंवार देत होता, असे विनोदच्या भावाने पोलिसांना सांगितले.
विश्वासात घेऊन केली फसवणूक
हत्येच्या दिवशी अरुणने आपला राग लपवत विनोदशी मैत्रीचे नाटक केले. त्याला विश्वासात घेऊन मुजफ्फरपूर जिल्ह्यातील गंगटी बाजारात घेऊन गेला. तिथे दोघांनी एकत्र नशा केली. माहोल हळुहळू बनवला जात होता. विनोदला काहीही संशय आला नाही. रात्रीच्या अंधाराचा फायदा घेत अरुणने त्याला गावाजवळील एका निर्जन ठिकाणी नेले आणि तिथे त्याच्यावर चाकूने सुमारे अर्धा डझन वार केले. गळा चिरून त्याची नृशंस हत्या करण्यात आली. शरीरावर जखमांच्या असंख्य खुणा आढळल्या.
मृतदेह शेतात फेकून पळाला
हत्या केल्यानंतर अरुणने थंड डोक्याने विनोदचा मृतदेह जवळच्या गव्हाच्या शेतात फेकून दिला आणि तो थेट सीतामढी जिल्ह्यातील आपल्या बहीण पुनिया देवीच्या घरी पळून गेला. पहाटे स्थानिकांना शेतात मृतदेह दिसताच गावात एकच गोंधळ उडाला. माहिती मिळताच एसडीपीओ सुशील कुमार यांच्या नेतृत्वाखाली पोलीस पथकाने घटनास्थळी धाव घेतली, मृतदेह ताब्यात घेऊन शवविच्छेदनासाठी पाठवला.
आरोपी व बहीण दोघेही जेरबंद
पोलिसांनी तातडीने हालचाली करत आरोपी अरुण कुमार आणि त्याची बहीण पुनिया देवी यांना सीतामढी जिल्ह्यातील गिद्दा फुलवरिया गावातून ताब्यात घेतले. सध्या दोघांची कसून चौकशी सुरू आहे. विनोदच्या कुटुंबावर दुःखाचा डोंगर कोसळला असून गावात तणावाचे वातावरण आहे. पोलिसांनी दोषींवर कडक कायदेशीर कारवाई करण्याचे आश्वासन दिले आहे.
— प्रतिनिधी वार्ता, शिवहर (बिहार)
